हिंगोली, दि. १८ (जिमाका): हिंगोलीच्या शासकीय वैद्यकीय महाविद्यालय व रुग्णालयात नव्याने उभारण्यात आलेल्या डायलिसिस युनिटचे अन्न व औषध प्रशासन, विशेष सहाय्य मंत्री तथा जिल्ह्याचे पालकमंत्री नरहरी झिरवाळ यांच्या हस्ते लोकार्पण झाले.
शासकीय वैद्यकीय महाविद्यालय व रुग्णालय, हिंगोली येथील या कार्यक्रमास आमदार संतोष बांगर, जिल्हाधिकारी राहुल गुप्ता, मुख्य कार्यकारी अधिकारी विवेक गायकवाड, अधिष्ठाता डॉ. श्रीचक्रधर मुंगल, वैद्यकीय अधीक्षक डॉ. दीपक मोरे आदींसह महाविद्यालय व रुग्णालयातील विविध विभागांचे विभागप्रमुख, प्राध्यापक, वैद्यकीय अधिकारी, परिचारिका तसेच अधिकारी व कर्मचारी मोठ्या संख्येने उपस्थित होते.
नव्याने कार्यान्वित करण्यात आलेल्या या डायलिसिस युनिटमुळे हिंगोली जिल्ह्यासह परिसरातील किडनीविकारग्रस्त व नियमित डायलिसिसची आवश्यकता असलेल्या रुग्णांना मोठा दिलासा मिळणार आहे. विशेषतः आर्थिकदृष्ट्या दुर्बल व गरजू रुग्णांना स्थानिक पातळीवर डायलिसिसची सुविधा उपलब्ध झाल्यामुळे उपचारासाठी इतर शहरांमध्ये जाण्याची गरज कमी होण्यास मदत होणार आहे. या सुविधेमुळे रुग्णांचा उपचारासाठी होणारा प्रवास, वेळ आणि आर्थिक भार कमी होण्यास मदत होणार असून, जिल्ह्यातील आरोग्यसेवा अधिक सक्षम होण्याच्या दृष्टीने हे एक महत्त्वपूर्ण पाऊल ठरणार आहे.
यावेळी पालकमंत्री झिरवाळ यांच्यासमवेत उपस्थित मान्यवरांनी डायलिसिस युनिटची पाहणी करून उपलब्ध वैद्यकीय सुविधा व उपचार व्यवस्थेची माहिती घेतली. रुग्णांना दर्जेदार, सुरक्षित आणि वेळेवर आरोग्यसेवा उपलब्ध करून देण्यासाठी शासकीय वैद्यकीय महाविद्यालय व रुग्णालय कटिबद्ध असल्याचे अधिष्ठाता यांनी पालकमंत्री झिरवाळ यांना सांगितले.
०००
Leave a Reply