बुलढाणा, दि. १९ (जिमाका): गणेशोत्सवातील भक्तीमय वातावरणाला लोकहिताच्या संवादाची जोड देत शासनाच्या विविध योजना आणि उपक्रमांची माहिती नागरिकांपर्यंत पोहोचविण्यासाठी ‘लोकसंवाद-२०२६’ उपक्रम राबविण्यात येत आहे. या उपक्रमांतर्गत जळगाव जामोद येथील मथाबाई गणेशोत्सव मंडळात दि. 20 सप्टेंबर रोजी सायंकाळी 7 वाजता विविध जनजागृतीपर कार्यक्रमांचे आयोजन करण्यात आले आहे.
माहिती व जनसंपर्क महासंचालनालयाच्या मार्गदर्शनाखाली जिल्हा माहिती कार्यालय, बुलढाणा यांच्या वतीने सार्वजनिक गणेशोत्सव मंडळांच्या सहकार्याने हा उपक्रम राबविण्यात येत आहे. गणेशोत्सवाच्या निमित्ताने एकत्र येणाऱ्या नागरिकांना शासकीय योजनांची थेट आणि सुलभ पद्धतीने माहिती मिळावी, हा उपक्रमाचा प्रमुख उद्देश आहे.
मथाबाई गणेशोत्सव मंडळात आरोग्य विभागाच्या विविध योजनांची माहिती देण्यासोबतच नागरिकांची आरोग्य तपासणी व आवश्यक समुपदेशन करण्यात येणार आहे. तसेच कृषी विभागाच्या योजना, शेतकऱ्यांसाठीच्या विविध सुविधा आणि महसूल विभागाशी संबंधित शासन निर्णय, आदेश व योजनांची माहितीही देण्यात येणार आहे.
गणेशोत्सवातून जनजागृती, योजनांची थेट माहिती
गणेशोत्सव हा केवळ धार्मिक उत्सव न राहता सामाजिक प्रबोधन आणि लोकजागृतीचे प्रभावी माध्यम ठरत आहे. याच माध्यमातून नागरिकांशी थेट संवाद साधून शासनाच्या लोककल्याणकारी योजना त्यांच्यापर्यंत पोहोचविण्याचा प्रयत्न ‘लोकसंवाद-२०२६’च्या माध्यमातून करण्यात येत आहे. या जनजागृतीपर उपक्रमाचा नागरिकांनी मोठ्या संख्येने लाभ घ्यावा, असे आवाहन जिल्हा माहिती कार्यालयाच्या वतीने करण्यात आले आहे.
००००
Leave a Reply