मुंबई, दि. १६ : गडचिरोली जिल्ह्यातील सेमाना येथे प्रस्तावित मत्स्यालयाची उभारणी अत्याधुनिक, नाविन्यपूर्ण आणि आकर्षक पद्धतीने करून ते पर्यटकांचे प्रमुख आकर्षण ठरेल, याची विशेष काळजी घ्यावी. पारंपरिक पद्धतीचे मत्स्यालय न उभारता पर्यटकांना वेगळा अनुभव देणाऱ्या संकल्पनेतून या प्रकल्पाची उभारणी करावी. या प्रकल्पामुळे गडचिरोलीच्या पर्यटनाला चालना मिळणार असल्याने त्याच्या उभारणीची कार्यवाही गतीने पूर्ण करावी, असे निर्देश मत्स्यव्यवसाय मंत्री नितेश राणे यांनी दिले.
मंत्री नितेश राणे यांच्या अध्यक्षतेखाली मंत्रालयातील त्यांच्या दालनात गडचिरोली जिल्ह्यातील सेमाना येथे प्रस्तावित मत्स्यालयाच्या उभारणीसंदर्भात आढावा बैठक झाली. यावेळी प्रस्तावित मत्स्यालयाच्या आराखड्याचे आणि संकल्पनेचे सादरीकरण करण्यात आले.
सेमाना येथे सुमारे एक ते सव्वा एकर जागेत हे मत्स्यालय उभारण्याचे प्रस्तावित आहे. या मत्स्यालयात सुमारे ५४ अॅक्रेलिक टाक्या उभारण्यात येणार असून, त्यामध्ये ८८ पेक्षा अधिक प्रजातींचे गोड्या पाण्यातील शोभिवंत मासे ठेवण्यात येणार आहेत. विविध प्रजातींच्या गोड्या पाण्यातील शोभिवंत माशांचा समावेश असलेल्या संकल्पनेवर आधारित या प्रकल्पाचे सादरीकरण आर. आर. मत्स्यालय सल्लागार संस्था यांच्या वतीने करण्यात आले.
गडचिरोली जिल्ह्यातील नैसर्गिक पर्यटनस्थळांना भेट देणाऱ्या पर्यटकांसाठी हे मत्स्यालय नवीन आकर्षण ठरणार आहे. त्यामुळे स्थानिक तसेच जिल्ह्यातील पर्यटनविकासाला चालना मिळण्यास मदत होणार आहे. मत्स्यालयाचे बाह्य व अंतर्गत स्वरूप, माशांच्या टाक्यांची मांडणी आणि पर्यटकांसाठीच्या सुविधा आकर्षक व आधुनिक असाव्यात, याबाबत मंत्री राणे यांनी संबंधित अधिकाऱ्यांना सूचना दिल्या.
या प्रकल्पाच्या अंमलबजावणीसाठी संबंधित विभागांनी आवश्यक समन्वय साधून पुढील कार्यवाही जलदगतीने करावी. वन विभागाशी संबंधित बाबींवर वनमंत्री गणेश नाईक यांच्याशी चर्चा करून आवश्यक कार्यवाही करावी, असे निर्देशही मंत्री राणे यांनी दिले.
बैठकीस गडचिरोलीचे आमदार डॉ. मिलिंद नरोटे तसेच संबंधित अधिकारी उपस्थित होते.
0000
